Ser på fleire endringar for å få ned prisen
På folkemøte i Kjøde gjorde Kystverket det klart at prosjektet no er inne i ei avgjerande fase, der ein må «snu kvar stein» for å spare fleire hundre millionar før saka kjem tilbake til Stortinget våren 2026.
Dette kom fram på møtet
Prosjektet held fram: Stortinget og Nærings- og fiskeridepartementet har bede Kystverket fullføre anbodet og forhandlingane for å få fram ein endeleg pris.
Kraftig kostnadsauke: Første tilbod frå entreprenørane indikerer ein kostnad på om lag 9,4 mrd. kroner, mot dagens kostnadsramme på 5,3 mrd.
Må spare mykje – men ikkje alt: Kystverket meiner det er mogleg å spare fleire hundre millionar kroner, men ikkje milliardar.
Steinmassar er nøkkelen: Handtering og transport av steinmassar er ein av dei største kostnadsdrivarane i prosjektet.
Gjenbruk prioritert: Målet er framleis å nytte steinmassane til næringsområde og andre tiltak, men rimelegare alternativ må også vurderast politisk.
Endringar vurderte: Det blir sett på justeringar i portalområde, entringskonstruksjonar, sjøfyllingar, Saltasundet og mogleg utvida deponi.
Planendringar kan bli nødvendige: Fleire av tiltaka krev dispensasjonar eller endringar i gjeldande planar.
Samfunnsnytte i minus: Netto nytte per budsjettkrone er framleis negativ, men prosjektet gir gevinstar i tryggleik, framkome og klima.
Klimaeffekt: Over 75 år er det rekna med ein netto reduksjon i klimagassutslepp på rundt 130 000 tonn CO₂-ekvivalentar.
Tidsplan: Kystverket skal levere nytt kostnadsgrunnlag innan 6. mars 2026. Politisk avgjerd er venta i revidert nasjonalbudsjett, med mogleg byggestart hausten 2026
